Presentacion de la sollicitud e documentacion [so] (2022)

Abstract

Eth procès de preinscripcion escolara se hè totaument en linha. Totun açò, en bèri casi cau aportar documents entà acreditar informacion o circonstàncies que, ara com ara, encara non se pòden consultar telematicament. Ei important d'auer aguesti documents escanejadi o fotografiadi ara ora de hèr era sollicitud de preinscripcion entà poder-les aportar.

Quan se hè era sollicitud de preinscripcion escolara, s'a d'acreditar documentaument era identitat deth pair, era mair, eth tutor o tutritz legau e presentar eth libre de familha o d'auti documents relatius ara filiacion. En cas des escolans en situacion d'acuelhuda, era resolucion d'acuelhuda. Er escolanat estrangèr a de presentar eth document d'identitat, eth libre de familha o bèra auta documentacion alternativa.

Entà justificar era proximitat geografica e optar a sumar-ne es punts segontes eth critèri de prioritat entara assignacion de places, se consultaràn es donades deth padron o s'acreditarà era residéncia damb un certificat o volant de conviuença.

Entà auer en compde era ubicacion deth lòc de trabalh, s'a d'aportar eth contracte laborau o un certificat dera enterpresa. En cas de trabalhadora o trabalhador autonòm, eth modèl 036 o 037 dera Agéncia Tributària.

Entà justificar que se percep era renda minima garantida, s'a d'aportar era certificacion o era resolucion emetuda peth Departament de Drets Sociaus.

S'un membre dera unitat familhara a ua discapacitat superiora ath 33% reconeishuda pera Generalitat de Catalonha, se validarà mejançant ua consulta interadministrativa o eth certificat o era targeta acreditativa.

En cas des carnets de familha nombrosa o monoparentau vigenti, emetudi pera Generalitat de Catalonha, se validarà aguesta informacion mejançant consulta interadministrativa, o ben en tot presentar eth carnet de familha nombrosa o eth de familha monoparentau en vigor.

Eth hèt d'auer neishut en un part multiple s'acredite damb eth libre de familha.

Era condicion de victima de violéncia de genre o terrorisme s'acredite damb era senténcia judiciau de quinsevolha orde jurisdiccionau, era orde de proteccion vigenta, o er informe des servicis sociaus o eth certificat qu'acredite era condicion de victima de terrorisme qu'emet era Sosdireccion Generau de Supòrt a Victimes deth Terrorisme deth Ministèri der Interior.